Soratra Masina ho an’ny herinandro
Levitikosy 25.18
Ary araho ny didiko, ary tandremo ny fitsipiko, ka araho izy ; dia handry fahizay amin’ny tany hianareo.

Mana Isan'Andro
Atalata 1 Oktobra 2024

Tsy ny mofo ihany no iveloman'ny olona,
fa ny teny rehetra izay alaoky ny vavan'Andriamanitra.
Matio 4.4

1 Samoela 11.1-15
Ny nandresen’i Saoly ny Amonita, sy ny nanavaozana ny fanjakana
¹Ary Nahasy Amonita niakatra ka nitoby tandrifin'i Jabesi-gileada ; dia hoy ny mponina rehetra tao Jabesy tamin'i Nahasy : Manaova fanekena aminay, dia hanompo anao izahay. ²Fa hoy Nahasy Amonita : Izao no hanaovako fanekena aminareo : hopotsirina ny masonareo ankavanana rehetra, ka hataoko fandatsana ny Isiraely rehetra izany. ³Fa hoy ny loholon'i Jabesy taminy : Omeo andro hafitoana izahay, mba hanirahanay olona ho any amin'ny fari-tanin'ny Isiraely rehetra, ka raha tàhiny tsy misy olona hamonjy anay, dia hivoaka hanatona anao izahay. ⁴Dia tonga tany Gibean'i Saoly ny iraka ka nanambara ny teniny teo anatrehan'ny vahoaka ; dia nanandratra ny feony ny vahoaka rehetra ka nitomany. ⁵Ary, indro, Saoly tonga nandroaka ny omby avy tany an-tsaha ka nanao hoe : Inona izato nanjo ny olona, no mitomany izy ? Ary nambarany azy ny tenin'ny mponina tao Jabesy. ⁶Dia nilatsaka tamin'i Saoly ny Fanahin'Andriamanitra, ka nirehitra mafy ny fahatezeran'i Saoly, raha nandre izany teny izany. ⁷Dia naka omby roa izy, ka norasainy ireo, dia nampitondrainy ny iraka ho any amin'ny fari-tanin'ny Isiraely rehetra ka nataony hoe : Na iza na iza tsy mivoaka hanaraka an'i Saoly sy Samoela, dia tahaka ireny no hanaovana ny ombiny. Dia nahazo ny olona ny fahatahorana an'i Jehovah, ka nivoaka toy ny olona iray ihany izy. ⁸Ary nandamina azy tany Bezeka izy, dia telo hetsy no isan'ny Zanak'Isiraely, ary telo alina no isan'ny lehilahy amin'ny Joda.
⁹Ary hoy izy tamin'ny iraka izay tonga teo : Izao no holazainareo amin'ny mponina ao Jabesi-gileada: Rahampitso ilay efa mafampana iny dia hisy famonjena ho anareo. Dia tonga ny iraka ka nanambara izany tamin'ny mponina tao Jabesy ; ka dia faly ireo. ¹⁰Ary hoy ny mponina tao Jabesy : Rahampitso no hivoahanay ho eny aminareo, dia hataonareo aminay izay rehetra sitrakareo. ¹¹Ary nony maraina, dia nozarain'i Saoly ho telo toko ny olona, ka tonga teo amin'ny toby tamin'ny fiambenana maraina izy ary namely ny Amonita mandra-pahafampanan'ny andro ; koa izay sisa dia niely patrana, ka tsy nisy olona tafaraka na dia hatramin'ny roa aza.
¹²Ary hoy ny vahoaka tamin'i Samoela : Iza moa no nanao hoe : Saoly va no hanjaka aminay ? Atolory ireny olona ireny hataonay maty. ¹³Fa hoy Saoly : Tsy hisy olona hatao maty anio ; fa androany no nanaovan'i Jehovah famonjena teo amin'ny Isiraely.